ఇద్దరి లోకం ఒకటే మూవీ రివ్యూ

రాజ్ తరుణ్ చేసినవి కొన్ని సినిమాలే అయినా మంచి ఫాలోయింగ్ సంపాదించుకున్నాడు. అందుకే దిల్ రాజు లాంటి పెద్ద నిర్మాత రాజ్ తరుణ్ తో వరుసగా సినిమాలు చేస్తున్నాడు. ఇందులో భాగంగా చేసిన చిత్రమే ఇద్దరిలోకం ఒకటే. ఫీల్ గుడ్ లవ్ స్టోరీగా ఈ చిత్రాన్ని నిర్మించారు.
రాజ్ తరుణ్, షాలిని పాండే, రాజా,నాజర్, భరత్ తదితరులు ముఖ్య పాత్రలు పోషించారు.
జి ఆర్ కృష్ణ దర్శకుడు. మిక్కీ సంగీతమందించాడు. ఈ సినిమా మంచి అంచనాల మధ్య ప్రేక్షకుల ముందుకు వచ్చేసింది. మరి ఈ సినిమా ఎలా ఉందో చూద్దాం.

కథేంటంటే :
మహి (రాజ్ తరుణ్) వర్ష (షాలినీ పాండే) ఒకరి కోసం ఒకరు అన్నట్లు ఇద్దరూ ఒకే రోజు పుడతారు. చిన్న తనంలోనే ఇద్దరు మధ్య బలమైన స్నేహం ఏర్పడినా.. ఆ తరువాత ఇద్దరూ విడిపోతారు. పెద్దయ్యాక వర్ష హీరోయిన్ అవ్వాలనే గోల్ పెట్టుకుని మూడు సంవత్సరాల నుండి ప్రయత్నాలు చేస్తూ కష్టపడుతూ ఉంటుంది. ఇటు మహి ఫోటోగ్రాఫర్ గా మంచి పేరు తెచ్చుకుంటాడు. ఇలా సాగుతున్న వీరి జీవితాలు వర్ష చిన్నప్పటి ఫోటో ద్వారా మళ్లీ కలుస్తాయి. ఆ తరువాత ఇద్దరు మధ్య చోటు చేసుకున్న సంఘటనలు ఏమిటి ? వర్ష తన గోల్ ను సాధించడానికి మహి ఎలా సాయ పడ్డాడు ? అప్పటికే వర్ష వేరే వ్యక్తితో పెళ్లికి ఒప్పుకున్నా.. మళ్లీ మహిని ఎలా ప్రేమిస్తోంది ? ఇద్దరూ తమ ప్రేమను వ్యక్తపరుచుకుంటారా ? లేదా ? అంతలో మహికి వచ్చిన సమస్య ఏమిటి ? చివరికీ వీరి ప్రేమ గెలిచిందా ? లాంటి విషయాలు తెలియాలంటే ఈ చిత్రం చూడాల్సిందే.

సమీక్ష
ఫీల్ గుడ్ లవ్ స్టోరీగా సాగే కథ ఇది. ఇద్దరి మధ్య ప్రేమను దర్శకుడు చాలా బాగా చూపించాడు. రాజ్ తరుణ్ యాక్టింగ్ చాలా బాగుంది. కథకు తగ్గట్టుగా క్యారెక్టర్లో ఒదిగిపోయాడు. పాత్రకు సరిగ్గా సరిపోయాడు. బాడీ లాంగ్వేజ్ చాలా బాగుంది. లుక్స్ పరంగాను కొత్తగా ట్రై చేశాడు. ఎక్కువుగా సరదాగా తిరిగే కుర్రాడి పాత్రలతో మరియు తన ఈజ్ యాక్టింగ్ తో ఆకట్టుకునే రాజ్ తరుణ్ నుండి.. ఇలాంటి సెటిల్డ్ పెర్ఫార్మెన్స్ రావడంతో ఫ్రెష్ గా అనిపించింది. ఇక ఈ సినిమాలో హీరోయిన్ గా నటించిన షాలినీ పాండే తన నటనతో పాటు గ్లామర్ తోనూ బాగా ఆకట్టుకుంది. ప్రేమ సన్నివేశాలతో పాటు, కొన్ని భావోద్వేగ సన్నివేశాల్లో కూడా తన పెర్ఫార్మెన్స్ తో షాలినీ మెప్పించింది. హీరోయిన్ కి మదర్ గా నటించిన రోహిణి ఎప్పటిలాగే తన ఎమోషనల్ నటనతో ఆకట్టుకుంది. అలాగే మరో కీలక పాత్రలో నటించిన నాజర్, మిగిలిన నటీనటులు కూడా తమ పాత్ర పరిధి మేరకు బాగా నటించారు. సినిమాలో మిక్కీ జె.మేయ‌ర్ అందించిన సంగీతం సినిమాకి బాగా ప్లస్ అయింది.

దర్శకుడు జి.ఆర్‌.కృష్ణ ప్యూర్ లవ్ కి సంబంధించి మంచి స్టోరీ లైన్ ను తీసుకున్నారు. ఆ లైన్ కు పూర్తి స్థాయిలో ఆకట్టుకునే విధంగా కథాకథనాలను రాసుకున్నాడు. ప్రేమ సన్నివేశాలు బాగా రాసుకున్నాడు. వాటిని బాగా ఎగ్జిక్యూట్ చేయగలిగాడు. ప్రేమ కథలు చాలా వచ్చినప్పటికీ… ఈ కథ కథనం చాలా ఫ్రెష్ గా అనిపిస్తుంది. సినిమా పూర్తిగా ఇంట్రస్టింగ్ స్క్రీన్ ప్లేతో డిఫరెంట్ ట్రీట్మెంట్ తో సాగుతుంది. ఫస్ట్ హాఫ్ లో ఇంటర్వెల్ సీన్ చాలా బాగా డిజైన్ చేశాడు. ఇక సెకెండాఫ్ లో ఎమోషనల్ గా నడిపాడు దర్శకుడు. సంగీత దర్శకుడు మిక్కీ జె మేయర్ అందించిన పాటలు బాగున్నాయి. ముఖ్యంగా హీరో హీరోయిన్ల మధ్య సెకండ్ హాఫ్ లో వచ్చే లవ్ సాంగ్ బాగుంది. అలాగే నేపధ్య సంగీతం కూడా ఆకట్టుకుంటుంది. తమ్మిరాజు ఎడిటింగ్ ఓకే అనిపిస్తోంది. సమీర్ రెడ్డి సినిమాటోగ్రఫీ బాగుంది. సినిమాలో దృశ్యాలన్నీ ఆయన చాలా అందంగా చూపించారు. నిర్మాత శిరీష్ పాటించిన ప్రొడక్షన్ వాల్యూస్ బాగున్నాయి.

ఓవరాల్ గా
లవ్ స్టోరీలను ఇష్టపడే వారికే కాదు ఫ్యామిలీ ఆడియెన్స్ ను కూడా మెప్పించే చిత్రమిది. ఎమోషనల్ లవ్ స్టోరీతో వచ్చిన ఈ ‘ఇద్దరి లోకం ఒకటే’ ఆసక్తికరంగా సాగే సినిమా. సో గో అండ్ వాచిట్